ခဏတာသာယာမှုနဲ့ ဇနီးကောင်းတစ်ယောက်ကို အလဲ အစားမထိုးမိပါစေနဲ့

သူနဲ့ကျွန်တော် အသက် ၂၅ နှစ်အရွယ်မှာ လက်ထပ်ခဲ့ကြတယ်။ ကြင်စဦးတုန်းက ပတ်ဝန်းကျင်တောင် မနာလိုရတဲ့ထိအောင် အရမ်းချစ်ခဲ့ကြတာပါပဲ။ အိမ်ထောင်သက် (၂) နှစ်ကြာတော့ ကျွန်တော်တို့ဘဝထဲကို သမီးလေးတစ်ယောက် ဝင်ရောက်လာတယ်။ သမီးလေး မမွေးခင်ကတည်းက သူအလုပ်ထွက်ပစ်လိုက်တယ်။ ကျောင်းတက်တဲ့အရွယ်ရောက်လာပြန်တော့လည်း ကလေးပြုစုပျိုးထောင်ဖို့ အကြောင်းပြချက်နဲ့ သူ အလုပ် မဝင်ပြန်ဘူး။ ကျွန်တော် ဘယ်ချိန်ပြန်လာတယ်၊ ဘယ်ချိန်အိမ်မှာရှိနေတယ်ဆိုတာတောင် သူစိတ်မဝင်စားဘူး။ ကျွန်တော် သူ့ကိုစိတ်ပျက်စ ပြုလာခဲ့တယ်။

ကလေးမွေးပြီးတော့ သူအရင်လို လှလှပပ မနေတော့တာကို သတိထားမိတယ်။ အိမ်နေရင်း တီရှပ်အပွနဲ့ ခပ်ပွပွ အားကစားဘောင်းဘီတွေကိုပဲ တွင်တွင်ဝတ်လာတော့တယ်။ ကျွန်တော်အလုပ်က ပြန်လာတိုင်း သူ့ကိုမြင်ရတာ အမောမပြေတော့ဘူး။ ဒါနဲ့ အသိတစ်ယောက် မိတ်ဆက်ပေးတဲ့ ‘ကြည်ပြာ’ ဆိုတဲ့ မိန်းကလေးနဲ့ ဆုံတွေ့ကြည့်ဖြစ်တယ်။ ကြည်ပြာက လှတယ်။ သဘောကောင်းတယ်။ ပတ်ဝန်းကျင်ကိုလည်း အရေးမစိုက်တတ်ဘူး။ တစ်နည်းအားဖြင့် ကြည်ပြာက ရင်ခုန်စရာ သိပ်ကောင်းတယ်။ ဒီလိုနဲ့ ကြည်ပြာနဲ့ ကျွန်တော်တို့ တွဲဖြစ်ခဲ့ကြတယ်။

ကွာရှင်းပေးဖို့ ကျွန်တော့်ဇနီးကို ကျွန်တော့်ဘက်ကနေပြီး စပြောခဲ့တယ်။ သူ ကျွန်တော့်ကို အံ့အားသင့်တဲ့ မျက်လုံးတွေနဲ့ ကြည့်နေခဲ့တယ်။ ပြီးတော့မေးတယ် ‘ကျွန်မဘာမှားလို့လဲ’ တဲ့။ အကြောင်းပြချက်တွေ ကျွန်တော် ပေးမနေတော့ဘူး မျက်ရည်စက်လက်နဲ့ သူတို့သားအမိကို စိတ်ပြတ်ပြတ်နဲ့ပဲ ထားပစ်ခဲ့လိုက်တယ်။ သူနဲ့ ကွာရှင်းပြီး ချစ်ရတဲ့ ကြည်ပြာနဲ့ အိမ်ထောင်ရေးတစ်ခု စတင်ဖြစ်တယ်။ ကြည်ပြာက သူနဲ့တခြားစီပါပဲ။ ပျော်ပျော်နေတယ်။ ဘားသွားတယ်၊ ကလပ်သွားတယ်၊ ဈေးဝယ်စင်တာတွေမှာ ရှော့ပင်ထွက်နေရတာကို သူနှစ်သက်တယ်။ ‘အိမ်မှာ ချက်စားရင် အရသာ ဒီလောက်ကောင်းမှာမဟုတ်ဘူး ကိုကို ဆိုင်ကောင်းကောင်းမှာပဲ ဝယ်စားကြရအောင်ပါ’ လို့ သူအမြဲပြောလေ့ရှိတယ်။ ကြည်ပြာနဲ့ ကျွန်တော် အမြဲမခွဲ တတွဲတွဲပါပဲ။ အရမ်းလည်း ချစ်ခဲ့ကြတယ်။

လတစ်လကုန်လို့ အသုံးစရိတ်တွေ ပြန်တွက်ကြည့်တာ အရင်ဇနီးဟောင်း လုပ်ပေးခဲ့တဲ့ အကျင့်တစ်ခုပါ။ ကျွန်တော်နဲ့ ကြည်ပြာ သုံးထားတဲ့ တစ်လစာ အသုံးစရိတ်တွေကို ကြည့်ပြီး မျက်လုံးပြူးသွားတယ်။ ဘဏ် အကောင့်ကလည်း မကြာခင် အနုတ်ပြတော့မယ့် လက္ခဏာအနေအထားမှာရှိတယ်။ ငွေရေးကြေးရေး ချွေတာဖို့ ကျွန်တော် ကြည်ပြာနဲ့ တိုင်ပင်မှ ရတော့မယ်။ ကြည်ပြာ သူ လက်မခံဘူး။ “ကြည်ပြာကတော့ ဒီထက်ပိုပြီး အသုံးစရိတ်ကို မလျှော့ချနိုင်ပါဘူး လျှော့မယ့်လျှော့ ကိုကိုပဲ လျှော့ပါ။” လို့ သူပြောတယ်။ သူလုပ်မြဲတိုင်း ဘားသွားတယ်၊ ကလပ်တက်တယ်၊ ဈေးဝယ်တယ် နောက်ဆုံးတော့ ဖဲရိုက်တာပါ အဆစ်ပါလာတယ်။ လောင်းကစားတွေပါ ပါလာတော့ ကျွန်တော်ရှာတဲ့ ဝင်ငွေနဲ့ မလောက်တော့ဘူး။ သူ့မှာရော ကျွန်တော့်မှာပါ အကြွေးတွေနဲ့ ဝိုင်းလာတယ်။ စိတ်တွေလေပြီး အရက်ကို အဖော်ပြုဖြစ်တယ်။ ကျွန်တော် လမ်းပျောက်နေတုန်း ၊ အကြွေးနွံထဲမှာ နစ်နေတုန်း မကြည်ပြာကတော့ ကျွန်တော့်ကို ဥပေက္ခာပြုပြီး သူဌေးတစ်ယောက်နောက်ကို ကောက်ကောက်ပါအောင် လိုက်သွားလေရဲ့။

ဤဆောင်းပါးကို ဂန္ထဝင် မဂ္ဂဇင်းမှ ရေးသားတင်ဆက်သည်။

ကျွန်တော်ကတော့ သူရှုပ်သွားတဲ့ အကြွေးတွေကို လိုက်ရှင်းရင်း နောက်ဆုံး ကျွန်တော်ပိုင်တဲ့ တိုက်ခန်းပါ အပေါင်ဆုံးသွားတော့တယ်။ ဒီလိုအချိန်မျိုးမှာ ကျွန်တော်သူ့ကို သိပ်သတိရတာပဲ။ သူဆိုတာ ကျွန်တော့်ရဲ့ ဇနီးဟောင်းလေ။ သူဆိုရင်တော့ ခက်ခဲရုန်းကန်နေရတဲ့ အခြေအနေမျိုးမှာ ကျွန်တော့်ကို ဒီလို ထားပစ်ခဲ့မှာလား။ စိတ်ညစ်ညစ်နဲ့ အိမ်ဟောင်းဘက်ကို ခြေဦးလှည့်ဖြစ်တယ်။

အိမ်ရှေ့ကို ကားတစ်စီး ဆိုက်လာတယ်။ သမီးလေး ကျောင်းသွားကြိုပြီး ပြန်ခဲ့ပုံပဲ။ ကားပေါ်က ဆင်းလာတဲ့ သူဟာ အရင်ကထက် လှလာလိုက်တာ။ ကျွန်တော့်ကို မြင်တော့ ကြောင်ပြီး ကြည့်နေသေးတယ်။ ကျွန်တော် သူ့ရှေ့ကို လျှောက်သွားလိုက်တယ်။ သူက သမီးကို အိမ်ထဲအရင်ဝင်ခိုင်းပြီး ကျွန်တော့်ကို အကျိုးအကြောင်း မေးမြန်းတော့ ဖြစ်ကြောင်းကုန်စင်ကို ပြောပြလိုက်မိတယ်။ သူအရမ်းလှလာတာနဲ့ ပတ်သက်ပြီး ကျွန်တော်မေးမိတော့ ဒီလိုပြန်ဖြေတယ်။  “ရှင်ထွက်သွားပြီးနောက်ပိုင်းမှာ ကျွန်မ အရင်ကအလုပ်မှာ ပြန်ဝင်ခဲ့တယ်။ ကိုယ့်ကိုယ်ကိုယ် ပိုပြီးဂရုစိုက်ဖြစ်တယ်။ လေ့ကျင့်ခန်းတွေလုပ်တယ်၊ စိတ်ကြည်လာအောင်လည်း တရားထိုင်ဖြစ်တယ်။ သမီးလေးအတွက်လည်း အရင်ကထက်ပိုပြီး အချိန်ပေးနိုင်ခဲ့တယ်။ ရှင်နဲ့ရှိတုန်းက လှလှပပမနေဖြစ်ခဲ့တာက ရှင်နဲ့သမီးလေးအတွက် အသုံးစရိတ်ပိုအောင် ကျွန်မချွေတာနေခဲ့တာပါ။ အခုတော့ သမီးလေးနဲ့ ကျွန်မ ကောင်းကောင်းရပ်တည်နိုင်ပါပြီ။ ဒီထက်ပိုပြီး ဘာကိုမှ မတောင့်တတော့ပါဘူး။”

မိသားစုနဲ့ ပတ်သက်တဲ့ သူမရဲ့ အမြင်ကို ကြားရတော့ ကျွန်တော် မှားသွားပြီဆိုတာ သိလိုက်ရတယ်။ အဖိုးတန်တဲ့ သူ့လို ဇနီးကောင်းတစ်ယောက်ကို ကျွန်တော် ဆုံးရှုံးလိုက်ရပြီ။ သူ့ဘက်က ခွင့်လွှတ်မယ်ဆိုရင်တောင် မခံယူဝံ့တော့တဲ့အထိ ရှက်မိပါတယ်။ ကျွန်တော့်အဖြစ်ကို သင်ခန်းစာယူပြီး ခဏတာ သာယာမှုနဲ့ အဖိုးတန်တဲ့ ဇနီးကောင်းကို မလဲပစ်ကြဖို့ တိုက်တွန်းပြောကြားပါရစေ။